 |
Sabado,
Agusto 30, 2008 |
2 lalaki giluba; 1 patay
Ni Stephanie S. Viovicente
NAKABSAN sa kinabuhi ang usa ka lalaki samtang kritikal ang laing usa human giluba niadtong Huwebes sa Katipunan, Lungsod sa Villanueva, Misamis Oriental.
Si PO1 Carol Quilang sa Villanueva Police Station niila sa duha ka mga biktima nga mao sila si Arnold Cabuntulan, 25, taga Poblacion, kinsa nakabsan sa kinabuhi ug Michael Maghayo, 24, taga Barangay Natumulan, lungsod sa Tagoloan, Misamis Oriental ug anaa karon kritikal nga kondisyon.
Gitumbok nga suspetsado mao si Richard Cobilla, 27, lumad nga taga lungsod sa Villanueva, Misamis Oriental.
Sa pakighinabi sa Sun.Star Superbalita ngadto kang PO1 Quilang, siya miingon nga samtang nagsuroy ang duha ka managhigala sa naasoy nga lungsod sa mga alas 5:30 sa hapon kalit lang kining giduolan ni Cobilla dayon luba kanila gamit ang kutsilyo.
Dugang ni Quilang daan na nga adunay panagbingkil nga nahitabo sa biktima diin nagdumot pag-ayo si Cobilla.
Nakaangkon og lawom nga samad dinunggaban si Cabuntulan sa dughan nga maoy gitouhan sa hinaling kamatayon niini.
Samtang nakaangkon sab og samad dinunggaban si Maghayo sa walang bahin sa dughan niini.
Daling gidala sa Northern Mindanao Medical Center (NMMC) ang duha ka biktima, apan gideklarar sa mga doktor nga dead on arrival na si Cabuntulan samtang kritikal ang kondisyon ni Maghayo nga anaa karon NMMC.
Sa pagresponde sa kapolisan sa maong hitabo pinangulohan ni SPO1 Nori Palme, ilang nasikop ang suspetsado nga anaa karon nagtingkagol sa silda sa Villanueva Police Station.
Sa pagsulat ning balita, gidala na sa puloy-anan ang patay'ng lawas ni Cabuntulan samtang andam na ang hingtungdan alang sa pagpasaka og tukmang kaso batok sa suspetsado.
(Agusto 30, 2008 isyu)
