 |
Sabado,
Agusto 30, 2008 |
Konduktor na-sideswiped, gipusil
GIREKLAMO sa usa ka konduktor ang lalaki human siya gibunalan og pistola ug na-sideswiped pa kini niadtong Huwebes mga alas 10:00 sa gabii sa dalan Capistrano-Hayes ning siyudad sa Cagayan de Oro.
Si PO1 Alaindelon Tacubao sa Police Station 1 (PS1) sa Divisoria niila sa konduktor nga mao si Ronald Ganuhon, 25, taga Lapasan ning siyudad.
Nasayran nga samtang nag-parking ang R2 Liner nga nagdala sa plaka KVH-278 ug gimaneho ni Adonis Ganuhon sa naasoy nga dapit ug kamulong panawag og pasahero ni Ronald, kalit lang kining na-sideswiped sa usa ka pick-up nga nagdala sa plaka CH-919.
Tungod sa kasakit nga naangkon sa konduktor, gituktok niini ang maong pick-up dihang kalit lang migawas ang nagmaneho niini nga nagdala og .45 kalibre dayon bunal sa iyang ulo hinungdan sa kasakit nga gibati.
Wala pa nakuntento ang maong lalaki gipabuto pa niini ang dalang pusil ngadto sa drayber sa maong PUJ ug swerteng wala kini maigo ug nakadagan pa.
Nasayran nga nagginukdanay ang maong drayber ug ang wala mailhing suspetsado. Sa pagresponde sa kapolisan sa PS1 sa maong dapit ilang na-recover ang usa ka empty shell samtang padayon pa sab nilang gipangita ang nanag-iya sa maong sakyanan diin human sa hitabo dali kining misibat. (SSV)
(Agusto 30, 2008 isyu)
