Sabado, Agusto 30, 2008

Babaye gikulata sa bana, igsuon

DUHA ka mga biktima sa pagpangdagmal sa managlahing sitwasyon ang ni-report sa kapolisan sa Police Station 2 (PS2) sa Cogon.

Unang nitaho ang usa ka babaye human gitabangan og kulata sa kaugalingong bana ug igsoun niadtong niaging adlaw sa Divisoria, ning siyudad sa Cagayan de Oro.

Si PO3 Jhonny Agutaya sa Police Station 2 (PS2) sa Cogon niila sa biktima nga mao si Sarah Gulay, 29, minyo, nagpuyo sa susamang dapit. Samtang wala pa masayri ang ngalan sa suspetsado.

Base sa taho sa biktima ngadto sa kapolisan iyang gisugilon nga gikulata siya sa iyang kaugalingong igsoun, sa nagkalaing-lain parte sa iyang kalawasan ug gibira pa gayud sa walay igong hinungdan.

Nakaangkon og grabeng bun-og sa kalawasan ang biktima human sa hitabo, samtang dugang nga giasoy sa biktima nga apil sa pag-maltrato kaniya ang iyang kaugalingong bana diin maoy hinungdan nga naapektuhasn kini sa panghunahuna ug pagbati.

Gitambagan ang biktima nga magppahigayon og medical check-up, samtang kini nga kaso padayon nga giatiman sa kapolisan.

Sa pikas bahin nagtingkagol sab sa silda ang usa ka lalaki human nangulata ug nananukmag niadtong Huwebes, mga alas 4:05 sa kaadlawon sa Capt. Vicente Roa St., ning siyudad sa Cagayan de Oro.

Si PO3 Adviento sa Police Station 2 (PS2) sa Divisoria niila sa biktima nga mao si Emiliano Acorda, 29, ulitawo, nagpuyo sa susamang dapit.

Gitumbok nga suspetsado mao si Rey Lopez, 27, minyo, taga Pasil, Kauswagan ning siyudad.

Nasayran gikan sa rekord sa kapolisan nga samtang nagtindog lamang sa naasoy nga dalan si Acorda, kalit lang kining giduolan ni Lopez ug diretsong nikulata kaniya ug wala pa nakuntento gibunalan pa kini og bato.

Nakaangkon og bun-og sa walang bahin sa nawong ug dakong samad sa likod nga bahin sa ulo ang biktima.

Ang panghitabo nasaksihan sa iyaan niini nga mao si Isabelle Acorda. Sa pagsulat ning balita andam ang biktima sa pagpasaka og kaso batok sa suspetsado.

(Agusto 30, 2008 isyu)