Sabado, Agusto 30, 2008

Besere: Zero crime kuno
Ni Jennifer L. Besere
Labtik

NIADTONG niaging semana, ang kapolisan ning dakbayan sa Cagayan de Oro nipahibalo nga zero crime kuno ang siyudad. Zero crime, nagpasabot nga walay natala nga mga kremin.

Maayo kaayo kini nga balita alang sa tanan labi na niadtong mga bisita kay kompyansa man sila nga walay dautang mahitabo kanila bisan pa man kong magsuroy-suroy sila og gabii dinhi sa siyudad.

Usa sa akong mga higala naka-text kanako dihang iyang nakita sa TV Patrol ang balita kabahin sa zero crime ang dakbayan sa Cagayan de Oro niadtong adlawa. Maayo kuno diay mga mosuroy dinhi.

Alang kanako nga nia ning maong trabaho nakapangutana sa akong higala kong asa siya nakadungog sa maong balita ug siya niingon nga iyang nakita sa telebisyon. Tungod kay ako mismo dili makatuo niini. Mao ba? kini ang akong tubag sa akong higala.

Kong atong paminawon diha sa radyo ug bisan ning mantalaan anaa man ang sunod-sunod nga pagpanulis ug bisan unsang kremin dinhi sa siyudad. Alang nako bisan pa man siguro kong usa lamang kini ka adlaw nga zero crime rate morag lisud man tuohan. Siguro walay natala sa mga police station nga mga hitabo apan unsaon man nato ang mga wala na lang magpa-blotter?

Mapasalamaton kita kong maong man gani kana ang nahitabo apan lagi sukwahi man siguro kana sa kamatuoran. Mahadlok na man gani mosakay og motorela ug dyip kining pipila tungod sa kahadlok nga tulison. Niadto lang niaging adlaw, upat ka mga babaye ang gitulis samtang sakay sa R2 Liner laing tulis usab ang nahitabo sa usa ka bakeshop ug niadto pang niaging semana gitulis ang Petron Gasoline Station sa Cugman. Unsa man kini nga mga hitabo, dili ba kini kremin?

Bisan man gani dili pahidangaton ang kapistahan ning siyudad anaa man kini nga mga hitabo kay lagi matod pa tima-ilhan kini sa nagkadako nga siyudad.

Nagdamgo man lang siguro kining atong kapolisan sa ilang zero crime rate. Apan sa laing bahin ato usab silang dayegon tungod kay malinawon man ang kasaulogan sa kapistahan ning siyudad.

(Agusto 30, 2008 isyu)