poetry

kangit-ngit...nag-ilog na usab.
Florilyn T. Moreno

nahamtong na usab ang kagab-ihon.
taod-taod, mahimugso na usab
ang bag-ong adlaw.

ang kangit-ngit ning gamay’ng espasyo
gidungaw sa kahayag sa poste
nga nagbilar pagsaksi sa komusyon sa kilom-kilom.
samtang ang kahilom gipukaw
sa hagishis sa sabad sa baratohong bentilador
sa ibabaw sa akong nahimutangan.

ang pangandoy kong duyogan ang imong pagtapilaw
gikawat sa imong nagpahulay’ng kaambong
daw may usa ka anghel
nga mikanaog gikan sa  langit
ug nasaag sa akong kiliran.

gigapos mo ang akong panan-aw
sa anino sa imong ngisi
ug kaanyag sa imong naw’ng
hinoon, wala mapugngan sa akong salabutan
ang kamot ko sa paghimas sa aping mo
nga gimarkahan pa sa ulat sa tagyawat nga imong gi-irok.

gibati ko ang imong espiritu
ug pitik sa kasing-kasing mong nagpayupo
sa dako mong gugma sa kinabuhi.
nagpaluyo niini ang hilabihan kadakong pag-antos mo
sa latigo sa kapalarang gisagubang mo
sa maskulado mong kaisog.

sa kanunay gigutom ako
sa kasina sa wala’y ugtas mong pasensya
ug gasa nga taliwala sa akong hubad nga kakulangon
gibistihan mo ako ug bag-ong paglaom.

apan, samtang gianod na usab ako sa suba sa handurawan
gisikop usab niini ang nagluya ko nang mga mata
ug hangtod ugmang gabii
sama sa mga niagi na
kawaton ko na pod pag-usab ang higayon
nga pintahon sa akong imahinasyon
ang nilalang nga niabuno sa patay kong pagtoo.

apan nakapangahas na pod ba kaha ikaw
sa pagpinta sa imahe niadtong katapusang higayon
usa ikaw gikawang kanako?
ug kung kini giukit mo sa kalangitang imong gidungawan
sud-ongon ko kini
miskan pa nga anoron ako sa akong mga luha
ug...

...sa imong hagok
ug hagishis sa baratohong bentilador
sa ibabaw sa atong nahimotangan.

[back to main page] [back to cebu page] [top]