NAANGOL ang usa ka motorista human nabangga ang gimanehing motor sa usa ka sakyanan ug jeep sa interseksyon sa E.O. Perez Street ug Mantawi Drive sa Mandaue City alas 9:40 sa buntag Lunes, Disyembre 30, 2019.
Sa pagsuwat ning balita, padayon pang giila ang biktima. Aduna'y plate number nga 0701-992226 ang iyang motorsiklo.
Sigon sa drayber sa jeep nga si Mervin Arandilla, 22, nagmaneho siya sa Mantawi Drive gikan sa may University of Cebu Medical Center (UCMed) og nimenor human nga nakita ang usa ka Ford nga sakyanan.
Sigon niya, hinay lang ang iyang padagan. Kusog nga nagpadagan ang motor nga miresulta sa pagkabangga niini sa Ford nga sakyanan ug sa jeep.
Tungod sa kakusog sa panagbangga, nalabay gikan sa iyang gimaniho nga motorsiklo ang biktima ug nabunal sa dalan.
Si Felix Sayas, ang enforcer sa maong interseksyon, miingon nga dili gyud malikayan ang disgrasya sa maong interseksyon tungod sagad sa mga motorista kusog gyud magpadagan.
Gisakay sa ambulansya ang drayber sa motor ug dali nga gidala sa UCMed. (KFD)
[Kini nga balita nag-update pa. Mamahimong i-refresh ang page o maglog on sa www.sunstar.com.ph alang sa lab-as nga mga balita.]