NAGPUSOTPUSOT ang mga pangutana ngadto sa buhatan sa Regional Anti-Cyber Crime Unit (RACU 7) labot sa mikatap karon nga mensahe nga gipadala pinaagi sa Messenger.
Ang mensahe nag-agni sa mga adunay Facebook nga paablihan kini tungod kay adunay surpresa nga mensahe nga gikan sa wish-you.co. Usa si Erica nga taga Barangay Apas, Siyudad sa Sugbo, nga nakadawat sa mensahe apan wa niya ablihi sa kahadlok kuon unsa.
“Wala ko mo open, Sir, kay basin virus na bah nya ma hack na hinuon ang akong Facebook account. Lahi na baya ang panahon karon, Sir, bah. Makahadlok na kaayo ang mga kriminal oy kay high tech na sab sila,” pulong ni Erica.
Si Police Colonel Marlo Castillo,hepe sa RACU 7, nipasidaan sa dihang nahinabi sa Superbalita Cebu nga di ablihan ang mensahe.
Matod niya nga daghang modus sa social media nga mahimong mabiktima sa identity theft.
Pasabot sa police official nga mahimong kuhaon ang tanang impormasyon sa social media sa usa ka tawo aron ipang himo og krimen, di lang sa Pilipinas, kon di sa ubang kanasuran.
“That is a form of malware. Baka makuha ang mga personal informations ninyo. Paki advice na lang sa mga constituents natin na wag silang mag click ng click dyan kase these are bad forms of viruses and malwares na makukuha ng mga hackers,” butyag ni Castillo.
Ning holiday season maoy paggawas sa mga virus sa internet diin mopadala silag mensahe sa Christmas, apan lahi na ang tumong ug tuyo.
Gipasabot usab ni Castillo nga ang malware usa ka matang sa virus nga kon i-click kini sa gipadalhan nga mensahe, mahimong iyang gub-on o mahimong makasulod siya sa system sa usa ka computer.
Niuso kini sa gawas sa nasud labi na sa dagkong mga kompaniya nga mi leak ang ilang mga impormasyon sa karibal nga kompaniya. Giangkon sa RACU-7 chief nga lisod ang pag-trace kon kinsa ang nagpasiugda sa virus nga mensahe nga bisan ang advance nga mga nasud wala maka sulbad niini.