DUHA ka stalls ang gisirado sa kapulisan human makuhai og dul-an 300 ka mga kahon sa ginadili nga pabuto Regional Civil Security Unit sa Cebu Firecrackers Market nga nahimutang sa South Road Properties dihang gihimo ang kalit nga inspeksyon sa Lunes, Disyembre 30, 2019.
Sigon ni Police Major Gregorio Nitura, assistant chief sa RCSU, ang duha sa 17 ka stalls ilang ipasirado human nahibaw-an nga namaligya og ginadiling mga pabuto. Ang RSCU nipahigayon sa kalit nga inspeksyon human sila nakakuha og tip nga adunay mga namaligya og ginadiling pabuto sa lugar
Ang nasakmit nga gilangkuban sa 13 ka nagkalainlaing ginadiling mga pabuto nagkantidad og P277,210.
Pipila sa ilegal nga mga pabuto naglangkob sa Pop-Pop, Pilipao, Rocket ug uban pa. Dungag ni Nitura nga ang mga pabuto nga gigama sa laing nasud, nahulog gihapon nga ilegal sanglit ang ila rang dawaton mao ang mga gihimo diri sa nasud.
Niadtong Disyembre 27, 2019, usa ka dakong tindahan sa Barangay Ermita gi-raid usad sa RCSU, diin dul-an 170,000 ka mga piraso sa 23 ka mga lain-lain nga klase sa mga pabuto nga adunay kantidad nga P323,120 ang nasakmit.
Asoy ni Nitsura nga ila nang gipahibawo ang tanang mga mamaligyaay sa dapit nga di mamaligya og ginadiling mga pabuto aron di mapasirado.
Iya usab gisuta ang seguridad ug kaluwasan sa mga manindahay ug mamalitay kon nisunod ba sa saktong lagda sa pamaligya.
Gisusi usab kon duna ba kiniy andam nga mga fire extinguisher ug tubig kon dunay sunog.
Gidili usab ang mga bata nga mag-estamby sa mga stall.
Kauban sa RSCU ang kapulisan sa Mambaling Police Station. (JCT)